మనిషి

యాభై అయిదు మాటల్లో కథ **** **** **** **** **** "తార్చడం మహాపాపం, మూర్ఖుడా!" " ........... " "దేవుడు తొలిసారి మనుషులను సృష్టించినప్పుడు పాపాత్ములున్నారా స్వామీ?" "లేరు" "ఒకానొక రోజు వాళ్లలో ఒకావిడకు ఎంతకూ తిండి దొరకలేదుట. పాపం, ఆకలికి తట్టుకోలేకపోయింది." "ఊఁ..." "వాళ్లలోనే అదృష్టవంతుడొకడు తిండి సంపాదించాడు. వాణ్ణడిగింది." "ఊఁ..." "వాడిచ్చాడు. ప్రతిఫలమడిగాడు. అయిష్టంగానే అంగీకరించింది." "ఊఁ..." "సృష్టించి, కడుపు మాడ్చి, చోద్యం చూసిన దేవుడే నాకు గురువు." "ఊ..." "మహాపాపమే... దైవకార్యమున్నూ." "ఊ...!?" "నా వాళ్లకు తిండి సంపాదించడానికి, నేను ఇతరులను ఉపయోగిస్తా." "ఊ..." "దేవుడెందుకు చేశాడో!" "...డో!?"

"సహనావవతు" - కలసి జీవింతుముగాక. "సహనౌభునక్తు" - కలసి భుజింతుముగాక. "సహవీర్యం కరవావహై" - మన శక్తులన్ని కలిపి పని చేయుదముగాక. "తేజస్వినావధీతమస్తు" - విద్వత్తుతో వెలుగొందుదముగాక. "మా విద్విషావహై" - మన మధ్య విద్వేషములు లేకుండుగాక. "ఓం శాంతి శాంతి శాంతిః" "సహనావవతు" - May we live together. "సహనౌభునక్తు" - May we enjoy our lives together. "సహవీర్యం కరవావహై" - May we put our energies together and work. "తేజస్వినావధీతమస్తు" - May we be illumined by study. "మా విద్విషావహై" - May we not hate each other. "ఓం శాంతి శాంతి శాంతిః" - O peace peace peace. చూ: వేదఘోష - సత్యశోధన - వేదాల్లో ఏంకావాలిష?

ఎక్కడికో తిరిగి వెళ్తున్నట్టుందే ... !? ఏమిటో భుజానవేసుకొని నడుస్తున్నాడు. అలసిపోడూ!?

చిత్రం: బ్లాగుమనసులు రచన: ఆత్రమయ్య బ్లాగుతా కొల్లగా 'ఫుల్లు'గా బడిబాబులా సదువుకో బుద్ధిగా మరింత శ్రద్ధగా... "బ్లాగుతా" మొదలుపెడితే మనసు కాస్త కుదుట పడతది కుదుటపడ్డ మనసుకేమొ నిదుర పడతది నిదురకన్న మనిషికేమి సౌఖ్యమున్నదీ ఆ సుఖము దోచుకొనుటకె మన బాసులున్నదీ... "బ్లాగుతా"

తమ ఖ్యాతి విస్తరించాలనేది నైజంగా ఉన్న జనాలనే ఎక్కువగా చూస్తుంటాం. కీర్తి కండూతితో సాధారణ ప్రజానీకం తమపైనే ఆధారపడేలా చేయడానికి శాయశక్తులా కృషిచేసేవారినీ చూస్తుంటాం. లేఖిని లేఖకుడు(code writer), రూపకర్త(designer) మరియు నిర్వాహకుడు అయిన వీవెన్ ఇందుకు భిన్నం. లేఖిని లాంటి సాధనాలమీద మీద ఆధారపడటం తగ్గించుకొమ్మంటున్నారు. లేఖిని లాంటి సాధనం లేకుండా ఇంగ్లీషు రాసినట్లు నేరుగా కంప్యూటర్లో తెలుగు రాయడం ఉత్తమమని వీవెన్ ఎప్పుడో అంగీకరించారు. తాను స్వయంగా Inscript కు మారి, మిగతా వారిని కూడా అటువైపే తిప్పే ప్రయత్నంలో భాగంగా "లేఖిని మూసేస్తే..." అనే ఆలోచనను కలిగించారు. తనకెంతో కీర్తిని తెచ్చిన, తెస్తున్న లేఖిని వాడకాన్ని తగ్గించుకొమ్మంటున్నారు. అరుదుగా కనిపించే ఇలాంటి నిస్వార్థపరత్వానికి మనం అభివాదాలు చేయాలి, అనుసరించాలి. కొత్త బ్లాగుస్పాటు(www2)కు మారకముందు నా బ్లాగులో లేఖినికి లంకె, ఆ లంకెమీదకు మూషికము రాగానే "వీవెన్ వర్థిల్లాలి!" అనే ఆశీస్సు కనిపించేది. నేను లేఖినితోనే తెలుగులో రాయడం మొదలెట్టినందువలన Inscript కు మారిన తరువాతకూడా కృతజ్ఞతాపూర్వకంగా ఆ లింకునూ ఆశీస్సునూ అలాగే ఉంచా

ఆ.వె కొత్తపాళి యొకటి కోరినంతనె వచ్చి చిత్తగించె నాదు చిన్ని కోర్కె! ఆటవెలది మదిని ఆంతర్యమేమిటో తేటతెల్లమాయె తెలిసికొనగ!! ఆ.వె నీరు తడుపలేదు నిప్పు కాల్పగలేదు హార్టువేరు చెడును "సాఫ్టు" చెడదు! ఆత్మ సాఫ్టువేరు అన్నాడు రానారె ఆలమేల! అన్ని ఆశలేల!? నాలుగు పాదాలలో యతి, గణాలు: 1 వ పాదం యతి - [నీరు - నిప్పు] నీరు - UI తడుప - III లేదు - UI నిప్పుకాల్ - UIU(ర) పగలేదు - IIUI(సల) 3ఇన 2ఇంద్ర 2 వ పాదం యతి [హార్టు - సాఫ్టు] హార్టు - UI వేరు - UI చెడును - III "సాఫ్టు" - UI చెడదు! - III 5ఇన 3వ పాదం యతి [ఆత్మ - అన్నాడు] ఆత్మ - UI సాఫ్టు - UI వేరు - UI అన్నాడు - UUI(త) రానారె - UUI(త) 3ఇన 2ఇంద్ర 4వ పాదం యతి [ఆల - ఆశ] ఆల - UI మేల - UI అన్ని - UI ఆశ - UI లేల - UI 5ఇన స్వాతి గారికి, కొత్తపాళీ గారికి, తెవికీ కి కృతజ్ఞతలతో.

ఆటవెలదినిగాని తేటగీతినిగాని చెప్పవలెనను చిన్ని కోర్కెగలిగె! చెప్పబోతినిగాని ఛందస్సుదెలియదే యేమిసేతుర లింగ యేమిసేతు!! గంగిగోవుపాలు గరిటెడైననుచాలు కడివెడైననేమి ఖరము పాలు! భక్తిగలిగిన కూడు పట్టెడైనను చాలు విశ్వదాభిరామ వినుర వేమ!! వేమన పద్యాలు వినీవినీ ఆ నడకలోనే నేను మాత్రం ఒక పద్యం నడపలేనా అనిపించి ఇలా నడిపించేశాను. ఇది ఆటవెలదియో లేక ఆట"వెలది" అయిందో తెలియజేసి పెద్దలు తమ ఆశీర్వాదాలో లేదా "అక్షింతలో" ప్రసాదించ ప్రార్థన. వాటితో పాటు ఆటవెలది లక్షణాలేమిటోకూడా తెలిసినవారు వివరించవలసిందని అర్థిస్తున్నాను. కృతజ్ఞతలు. - రానారె

డెబ్బై ఆరేళ్ల బుడుగు తన బాల్యం గురించి చెప్పిన సంగతులు. బాపు-రమణ ద్వయంలోని ముళ్లపూడి వెంకటరమణ రచనల గురించి ఆలోచనకు రాగానే వెంటనే స్ఫురణకు వచ్చే "బుడుగు" ఆయన చిన్నప్పటి ముద్దుపేరు. ఆయన తన బాల్యమును గురించి ఆంధ్రజ్యోతి వారి కోరికమేరకు ఉగాది సంచికకు రాసిన ఇటీవలి రచన చదువుతూ ఉండగా ఒక వాక్యం నన్ను కట్టిపడేసింది. చిన్నతనంలో తండ్రిని కోల్పోయి, ఆస్తులను, ఆడంబరాలమూ కోల్పోయి, అమ్మ చేసే కష్టంతో వచ్చే చాలీచాలని సంపాదనతో చెన్నపట్నం(చెన్నై)లో మొండిగా బ్రతుకు బండిని లాగుతున్న రోజులను ఆయన ఇలా గుర్తుచేసుకుంటారు: "ఇద్దరం పొద్దున్నే ప్రెస్సుకి వెళ్లేవాళ్లం. పొద్దున్న ఏడునుంచి, సాయంత్రం ఏడుదాకా నిలబడి కంపోజింగ్ చేసేది మా అమ్మ. నేను తొమ్మిది గంటలకు స్కూలుకు వెళితే నాకు రెండు ఇడ్డెనలు కొనిపెట్టి మిగిలిన పచ్చడి తను తినేది. సాయంత్రం నాలున్నరకి వెళితే ప్రెస్సు వాళ్లు ఏదేనా పెట్టేవాళ్లు. మేమిద్దరం తినేవాడిని." -- -- తల్లీకొడుకులిద్దరూ ప్రెస్సువాళ్లు పెట్టింది "తినేవాడు". అంత సేపు నిలబడి పనిచేసిన తల్లి, దొరికిన ఆ కాస్త తిండినీ తాను తిన్నట్టుగాచేసి బిడ్డకే పెట్టే పరిస్థితిని " మ

దేవులపల్లి కృష్ణశాస్త్రిగారి పదాలకు పాలగుమ్మి విశ్వనాథంగారు స్వరాలద్దిన ఈ పాట... పాపం, నాకు నచ్చింది, నా నోటబడింది . ముందుగానే చెప్పి చేస్తున్నాను గనుక పూచీ నాది కాదు . powered by ODEO ఎన్ని సారులు అన్ననూ ఎన్నెన్ని తీరులు విన్ననూ అన్నకొలదీ విన్నకొలదీ అమృత భరితము రామచరితము ఎన్ని సారులు అన్ననూ ఎన్నెన్ని తీరులు విన్ననూ కలముపట్టి కవివరేణ్యులు గళమువిప్పి గాయకులు నీ మధురనామము కొలువగా మైమరచినిను ధ్యానించగా వెలసెనెన్నో పాటలు నినుజేరుటకు విరిబాటలు బ్రతుకు బరువై సుఖము కరువై అలసిసొలసిన వేళలా యే దారిలేని ఎడారిలో .... యే దారిలేని ఎడారిలో ఆధారమైనది నీదు నామము కొవ్వలిగారు ఈ పాటను మరింత శ్రద్ధగా పాడారు. ఈ లలితగీతాన్ని పరిచయం చేసినందుకు వారికి కృతజ్ఞతలు. ఆయన గాత్రం వినండి.

టెక్సాస్ బ్లూ బొనెట్‌లుగా పిలువబడే ఈ అడవిపూలు టెక్సాస్‌లో ఈ నెలంతా రోడ్లకిరువైపులా సర్వసాధారణంగా కనిపిస్తాయి. జూలై నుండి వడగాడ్పులూ, మండే ఎండలు, డిసెంబరు నుండి వణికించే చలి వలన ఎడారిని తలపించిన ఈ ప్రాంతంలోకి ఫిబ్రవరిలో వర్షాలుపడగానే ఈ పూలు వసంతాన్ని ఆహ్వానించి మాయమౌతాయి.