Thursday, October 23, 2008

జగజ్జేత - చెంఘిజ్‌ఖాన్

"మానవునిలో వుండే బలహీనత లన్నింటిలోనూ, యితరుల బాధచూసి ఓర్చలేకపోవటం వంటి దురదృష్టకరమైన బలహీనత మరొకటి లేదు. ఏ రకం కిరాతుడిలోనైనా సరే, ఇది యే మూలనో ఒక మూల యింతో అంతో అణగి వుంటుంది. ఈ విషయాన్ని అర్థం చేసుకున్నవాళ్లు, ఎంత లావు ధీశాలినైనా సరే, ఇట్టే కూలదీసివేయగలుగుతారు. తండ్రి, తను కోరిన వస్తువు ఇవ్వకపోతే, బిడ్డ అన్నం తినకుండా ఏడుస్తూ మంచంలో యెదుట పడుకుంటుంది. భర్త చెప్పినమాట వినేవాడు కాకపోతే, భార్య ఏడుస్తూ కూర్చుని వాణ్ణి లొంగదీస్తుంది. కానీయో దమ్మిడీయో పారవెయ్యకపోతే, మొండి బండాడు కత్తితో చెయ్యో కాలో కోసుకుంటానని మనని బెదిరిస్తాడు. పెళ్ళాంమీద కోపమొస్తే మొగుడు అన్నం తినకుండా మొండిచరిచి పడుకుంటాడు. ఈ రకంగా మానవునిలో వుండే యీ మహా దౌర్బల్యాన్ని ఆధారం చేసుకుని, వొత్తిడి తీసుకురావడంవంటి హిజాడ పని మరొకటి లేదు. న్యాయమైన పద్ధతిని ఎదుటివాడికి నచ్చచెప్పలేక, కొంతమంది ఇలాంటి నీచమైన పిరికిపద్ధతులు అవలంబించుతారు."


12, 13 శతాబ్దాలలో మంగోల్ యుద్ధాల వెనక ఉన్న రాజకీయ, చారిత్రక స్థితిగతులను - తననాటికున్న వివిధ గ్రంథాల నాధారంగా ఎంతో నైపుణ్యంతో చరిత్రను కాల్పనిక కావ్యంగా మలచి, తెన్నేటి సూరి చేసిన సాధికారిక రచన చెఘింజ్‌ఖాన్ నవల. యాభైమూడేళ్లకు ముందు ప్రథమ ముద్రణ పొందిన ఈ నవల ఎవ్వరికీ కొత్త కాకపోయినా, నేను ఇటీవలే చదవడం తటస్థించింది. చదవడంలో నేను పరమనిదానం. ఒకో వాక్యాన్ని పట్టి పట్టి చదవనిదే ముందుకు పోవడం నాకు తృప్తిగా వుండదు. అలా మామూలుగా చదువుకుంటూపోతే అందని ఏదో మహత్తును ప్రతి వాక్యంలో/పేరాలో/పేజీలో రచయిత దాచి వుంటాడనే అనుమానం నాకు. వేగంగా చదవలేకపోవడం నా బలహీనతే కావచ్చుగానీ దానివల్ల కొన్ని ఉపయోగాలు కూడా వున్నాయి, అది వేరే విషయం. అలాంటి నాతో ఏకబిగిన చదివింపజేసిన పుస్తకం ఇదే. ఎంతో ఉత్కంఠగా చదువుతూపోతున్నా, అందులోని కొన్ని కొన్ని వాక్యాలు నన్ను కాసేపు ఆపి, మళ్లీమళ్లీ చదివింపజేశాయి. అలాంటి వాక్యాలన్నింటిలో నాకు ముందుగా గుర్తుకొచ్చేవి పై వాక్యాలు.

కాగా, నాకు కొంత నవ్వు తెప్పించి, కొంత ఆశ్చర్యపరచిన ఆసక్తికరమైన మాటలు ఇవీ (టెమూజిన్-బుర్టీల పెళ్లిచూపుల సన్నివేశం)...

"మన మామూలు అందగత్తెలకూ, బుర్టీకి చాలా తేడా వుంది. కలువల్లాంటి కళ్ళూ, పువ్వుల్లాంటి బుగ్గలూ, తామరతూళ్లలాంటి చేతులూ, నల్లికిల పాముల్లా మెలితిరిగిపోయిన వ్రేళ్లూ, సన్నగా ఈచుకుపోయిన ఊగిసలాడే నడుము - ఇలాంటి క్షయరోగి బాపతు ఆడదికాదు బుర్టీ. అలంకార శాస్త్రజ్ఞులు అందగత్తెగా అంగీకరించకపోతే పోతారుగాక, ఆరోగ్యవంతుడైన యే మొగాడికైనా ఆ రూపం చూడ్డం తోటే వెర్రెత్తి పోతుంది. కొంచెం పొట్టికురచ మనిషి. తెలివితేటలు ఉట్టిపడుతున్న తీవ్రమైన కళ్లు. నిట్టూర్పుకు నిట్టూర్పుకు ఉవ్వెత్తుగా లేచిపడుతున్న బరువైన చనుకట్టు. గుఱ్ఱపు వెన్నులాంటి బలమైన నడుం."


మీరిదివరకే ఈ పుస్తకాన్ని చదివివున్నా సరే, మళ్లీ తప్పక చదవండి. చదవనివాళ్లకు ప్రత్యేకంగా చెప్పాలా? ఈ నవలలో ఎన్నో మనస్తత్వాలు, ఎన్నో పరిస్థితులు, ఎన్నో వర్ణనలు, ఎన్నెన్నో ఆలోచనలు... బ్రేవ్‌హార్ట్, ఎపోకాలిప్టో లాంటి మెల్‌గిబ్సన్ చిత్రాలు కలిగించలేని ఉద్వేగభరిత సన్నివేశాలు మీ కళ్ల ముందు కదలాడతాయని, మీ మనసుల్లో ఎప్పటికీ నిలిచే ఉపయోగకరమైన కొన్ని ఆలోచనలను ఈ నవల మీలో కలిగిస్తుందని నేను నమ్ముతున్నాను. విశాలాంధ్రవారి అంగళ్లలో తప్పకుండా దొరుకుతుంది. వెంటనే దాడిచెయ్యండి. లేదా అంతర్జాలంలో అజోవిభోవారిద్వారా తెప్పించండి.

10 comments:

Purnima said...

ఈ పుస్తకం నా అరలో అలా పడుంది. ఇక చదివేయాలి. నాలో ఆ ఇంటెరెస్ట్ కలిగించినందుకు మీకూ మీ టపాకి కృతజ్ఞతలు! మరిన్ని మంచి పుస్తక విశేషాలు తెలియజేస్తారని ఆశిస్తూ

పూర్ణిమ

Vamsi M Maganti said...

Tenneti Soori is a great master of words. Not to boast - I have read it numerous, innumerous times and everytime that book mesmerises me. My father had few original copies of this book and the last one is still surviving in my home with pages just hanging to their life..waiting for their last journey. We had to give away quite a number of books to the city central library and I regret quite a bit now. But there was no option at that time...any ways...:)..

sUTU bODgaa baT TengrI TemUjin khAkhAn, tennETi sUri jindAbAd...

చైతన్య క్రిష్ణ పాటూరు said...

మంచి పుస్తకం గురించి రాసారు. ఈ పుస్తకం మనల్ని వేరే ప్రపంచంలోకి తీసుకెళ్తుంది. సారికీహార్ ఎడారీ, బూర్ఖాన్ పర్వతాలు మన కళ్ళ ముందు ఉన్నట్టే ఉంటుంది. ఎన్నిసార్లు చదివినా విసుగు కలిగించని పుస్తకాలలో ఇది ఒకటి. పరమ క్రూరుడైన నియంతగా పేరు తెచ్చుకున్న టెముజిన్ ఖాఖాన్ మనకు గొప్ప దార్శనికుడిగా అనిపిస్తాడు.

చైతన్య said...

మీ టపాకి కృతజ్ఞతలు!మంచి పుస్తకం గురించి రాసారు.

bujji said...

you can find this in Ameerpet, KPHB books exbitions also.

నెటిజన్ said...

ఎన్ని వందల సార్లు చదివినా తనివి తీరని పుస్తకం ఇది.

అలాగే, ఒమార్ షరిఫ్, హాలివుడ్ నటుడు ఆ పాత్రలో జీవించాడు అంటే అతిశయోక్తి కాదేమో.

ఈ బ్లాగ్‌లోకంలో చాలా మంది ఈ పుస్తకాన్ని పరిచయం చేస్తున్నారు.

పూర్ణిమా, మీరొక మంచి నవలని మిస్స్ అవుతున్నారు.

వంశీ గారు ఆ ప్రతిని బైండ్ చేసి దాచుకోవాలి.

నరహరి said...

I have read about Chengiz Khan in Yandamoori Navals (Non-fiction). Thank you for introducing me this nice book. This will be the next book to read. Thank You Rama Natha Reddy

రాజేంద్ర కుమార్ దేవరపల్లి said...

రానారె మీరు చూసితీరాల్సిన లింకు:

http://www.eenadu.net/archives/archive-18-9-2008/sahithyam/display.asp?url=maha167.htm

రానారె said...

థాంక్యూ రాజేంద్రగారూ! ఈ నవలకు చీకోలు సుందరయ్యగారిచ్చిన పరిచయం బాగుంది. దీనికి సమీక్ష రాయడం పెద్దపెద్దవారికే చెల్లుతుందేమో. ఎన్ని విశేషాలు ఈ నవలలో! తలచుకొనేకొద్దీ కనబడుతూనే వున్నాయి. తెన్నేటిసూరిని మాటలమాంత్రికుడనడం ఏమాత్రం అతిశయోక్తి కాదు గదా! సన్నివేశానికీ పాత్రలకూ తగినట్టుగా కాస్తంత మారుతూ వినిపించే భాష, మాటలూ ఈ నవలను చదువుతున్నంతసేపూ నిజంగానే సమ్మోహనపరుస్తాయి. నవల ప్రారంభంలో 'గాలిమీనా తేలిపోయే కదనుగుఱ్ఱం రౌతుకాడా' అంటూ మొదలయ్యే ఒక్క పాటతోనే ఆనాటి గోబీ ఎడారి మనకు పరిచయమైపోతుంది, ఆ మనుషుల జీవనం కొంత బోధపడుతుంది. మరీ అతిశయోక్తులాడినట్లుందనే భయంతో, ఈ రచన గురించి నా అభిప్రాయాలను చెప్పకుండా, చదవనివాళ్లు చదవండి అని మాత్రం అభ్యర్థిస్తున్నాను.

రవి said...

ఈ పుస్తకం విశాలాంధ్రలో చూసినా పట్టించుకోలేదు. చెంగిజ్ ఖాన్ లాంటి వాళ్ళ గురించి ఏమ్ చదవాలి అనే నా చాదస్తం దానికి కారణం. ఈ సారి వెళ్ళినప్పుడు తీయాలి.ఇలాంటి పుస్తకాలను అప్పుడప్పుడూ పరిచయం చేస్తూ ఉండండి.

పుస్తక పరిచయంలో మొదటి పేరా (emotional blockmailing మీద)బావుంది.యాదృచ్చికంగా నేనూ అదే అంతర్మథనం లో ఉన్నాను., కొంత కాలంగా.

Post a Comment

ఇక్కడ తెలుగులో వ్యాఖ్యనించడం ఎలాగో మీకు తెలియలేకపోతే, అంకెలతో వ్యాఖ్యానించవచ్చు. నచ్చింది 5/10. చాలా బాగుంది 7/10 ఇలాగ.